ກອງປະຊຸມໄດ້ຈັດຂຶ້ນທີ່ຫ້ອງປະຊຸມ ພະແນກຊັບພະຍາກອນທໍາມະຊາດ ແລະ ສິ່ງແວດລ້ອມແຂວງຫຼວງນໍ້າທາ ໃນຕອນເຊົ້າຂອງວັນທີ 24 ກັນຍາ 2020, ໂດຍການເປັນປະທານຂອງ ທ່ານ ສຸກສັນ ພົນປະດິດ ຄະນະພັກຮາກຖານ, ຮອງຫົວໜ້າພະແນກຊັບພະຍາກອນທໍາມະຊາດ ແລະ ສິ່ງແວດລ້ອມ, ມີຄະນະພະແນກ, ຫົວໜ້າຂະແໜງ, ຮອງຫົວໜ້າຂະແໜງ ແລະ ຕະຫຼອດຮອດພະນັກງານວິຊາການພາຍໃນ ພຊສ ເຂົ້າຮ່ວມ.
ກອງປະຊຸມ ໄດ້ຜ່ານແຜນການລົງທຶນ 5 ປີ ແຕ່ ປີ 2021 ຫາ 2025 ຂອງຂະແໜງຊັບພະຍາກອທໍາມະຊາດ ແລະ ສິ່ງແວດລ້ອມ, ກອງປະຊຸມໄດ້ປຶກສາຫາລື ແລະ ປະກອບຄໍາຄິດຄໍາເຫັນໃສ່ແຜນການລົງທຶນ ແຕ່ລະໂຄງການ ເພື່ອໃຫ້ສອດຄ່ອງກັບການຈັດຕັ້ງປະຕິບັດຕົວຈິງໃນແຕ່ລະໄລຍະ, ເຊິ່ງມີໂຄງການລົງທຶນທັງໝົດ 42 ໂຄງການ, ໃນນັ້ນປະກອບມີ:
- ໂຄງການຕາມແຜນປົກປະຕິ ປະກອບມີ 8 ໂຄງການບຸລິມະສິດ;
- ໂຄງການສະເໜີງົບປະມານນໍາກອງທຶນປົກປັກຮັກສາສິ່ງແວດລ້ອມ ປະກອບມີ 21 ໂຄງການບຸລິມະສິດ;
- ໂຄງການສະເໜີທຶນນໍາຕ່າງປະເທດ (ODA) ປະກອບມີ 13 ໂຄງການບຸລິມະສິດ.
ໃນວະລະກອງປະຊຸມ, ຍັງໄດ້ຜ່ານເອກະສານຜົນສໍາເລັດກອງປະຊຸມສະໄໝສາມັນເທື່ອທີ່ IX ຂອງສະພາແຫ່ງຊາດ ແລະ ສະພາປະຊາຊົນທ້ອງຖິ່ນຊຸດທີ່ I; ໃນໂອກາດດຽວກັນນັ້ນ ກອງປະຊຸມຍັງໄດ້ເຜີຍແຜ່ດໍາລັດວ່າດ້ວຍຄວາມຮັບຜິດຊອບໃນການສະກັດກັ້ນການຝອກເງິນ ແລະ ການສະໜອງທຶນໃຫ້ແກ່ການກໍການຮ້າຍ.