ກອງປະຊຸມໃຫຍ່ ສະມາຊິກພັກ ຄັ້ງທີ II ຂອງຄະນະພັກຮາກຖານ ພະແນກຊັບພະຍາກອນທຳມະຊາດ ແລະ ສິ່ງແວດລ້ອມແຂວງ ໄດ້ໄຂຂຶ້ນ ໃນເວລາ 8 ໂມງ 00 ນາທີ ຂອງວັນທີ 2 ມິຖຸນາ 2020 ຢູ່ທີ່ສະໂມສອນແຂວງ; ໂດຍການເປັນປະທານ ຂອງສະຫາຍ ສົມຫວັງ ນາບຸນແພງ ເລຂາຄະນະພັກຮາກຖານ ຫົວໜ້າພະແນກຊັບພະຍາກອນທຳມະຊາດ ແລະ ສິ່ງແວດລ້ອມ; ເປັນກຽດເຂົ້າຮ່ວມກອງປະຊຸມຄັ້ງນີ້ມີ ສະຫາຍ ຄຳໄຫຼ ສີປະເສິດ ກຳມະການປະຈຳພັກແຂວງ ຮອງເຈົ້າແຂວງໆ ຫຼວງນ້ຳທາ; ມີຜູ້ແທນສົມບູນເຂົ້້າຮ່ວມທັງໝົດ 44 ສະຫາຍ, ຍິງ 16 ສະຫາຍ, ຜູ້ແທນສຳຮອງ 7 ສະຫາຍ, ຍິງ 5 ສະຫາຍ ແລະ ແຂກຖືກເຊີນ 15 ສະຫາຍ, ຍິງ 2 ສະຫາຍ.
ສະຫາຍ ອັອດ ສິງສະຫວັດ ຮອງເລຂາຄະນະພັກຮາກຖານ ຮອງຫົວໜ້າພະແນກຊັບພະຍາກອນທໍາມະຊາດ ແລະ ສິ່ງແວດລ້ອມແຂວງ, ໄດ້ຜ່ານຮ່າງບົດລາຍງານການເມືອງ ໃນໄລຍະ 5 ປີ 2016-2020 ແລະ ທິດທາງແຜນການ 5 ປີ 2021 ຫາ 2025, ຄະນະພັກຮາກຖານ ພະແນກຊັບພະຍາກອນທໍາມະຊາດ ແລະ ສິ່ງແວດລ້ອມ ແຂວງຫຼວງນໍ້າທາ ປະກອບມີຄະນະພັກຮາກຖານ 4 ສະຫາຍ, ມີ 4 ໜ່ວຍພັກທີ່ຂື້ນກັບຄື: ໜ່ວຍພັກຈັດຕັ້ງ ແລະ ບໍລິຫານ, ໜ່ວຍແຜນການ ແລະ ກວດກາ, ໜ່ວຍພັກສິ່ງແວດລ້ອມ ແລະ ຊັບພະຍາກອນນໍ້າ, ໜ່ວຍພັກທີດີນ ແລະ ຕິດຕາມກວດກາ. ມີສະມາຊິກທັງໝົດ 51 ສາຫາຍ, ຍິງ 21 ສະຫາຍ, ໃນນີ້ມີ ສະມາຊິກພັກສົມບູນ 44 ສະຫາຍ, ຍິງ 16 ສະຫາຍ.
ໃນໄລຍະ 5 ປີຜ່ານມາຄະນະພັກຮາກຖານໄດ້ເອົາໃຈໃສ່ປັບປຸງການຈັດຕັ້ງພັກ ໃຫ້ມີຄວາມເຂັ້ມແຂງໜັກແໜ້ນຂື້ນກ່ວາເກົ່າໂດຍຈັດຕັ້ງປະຕິບັດວຽກງານພັກຢ່າງເຂັ້ມງວດຕາມ 5 ຫຼັກການ 3 ທິດນໍາ, ຖືເອົາການກໍ່ສ້າງໜ່ວຍພັກປອດໃສ ເຂັ້ມແຂງ ໜັກແໜ້ນ ເປັນການປັບປຸງການຈັດຕັ້ງພັກ ແລະ ກໍ່ສ້າງສະມາຊິພັກ, ດ້ານວຽກງານວິຊາສະເພາະ ໄດ້ລົງສໍາຫຼວດວັດແທກທີດິນໄດ້ 17.768 ຕອນ, ສອບສວນສິດໃນທົ່ວແຂວງໄດ້ 9.711 ຕອນ, ເຊັນໃບຕາດິນທົ່ວແຂວງໄດ້ 14.412 ຕອນ, ຕິດຕາມກວດກາ ແຜນຄຸ້ມຄອງສິ່ງແວດລ້ອມທໍາມະຊາດ ແລະ ສັງຄົມ ຂອງໂຄງການຂະໜາດໃຫ່ຍ ທີ່ໄດ້ຮັບໃບຢັ້ງຢືນທາງດ້ານສິ່ງແວດລອ້ມ EIA ຈໍານວນ 8 ໂຄງການ, ປະຕິບັດກວດກາໄດ້ 10 ຄັ້ງ, ລົງເກັບຕົວຢ່າງນໍ້າ ພ້ອມທັງວັດແທກຄຸນນະພາບນໍ້າ ໜ້າດີນຢູ່ແມ່ນໍ້າຂອງ ເມືອງລອງ ສົ່ງເຂົ້າຫ້ອງທົດລອງສະຖາບັນກະຊວງ ຊັບພະຍາກອນທໍາມະຊາດ ແລະ ສິ່ງແວດລ້ອມ ໄດ້ 47 ຄັ້ງ, ໄດ້ອອກໃບຢັ້ງຢືນຮັບຮອງດ້ານສິ່ງແວດລ້ອມ 228 ສະບັບ, ລົງຕິດຕາມກວດການການຈັດຕັ້ງປະຕິບັດແຜນຄຸ້ມຄອງສິງແວດລ້ອມຂອງກິດຈະການຕ່າງໆ.
ບັນດາສະຫາຍເຂົ້າຮ່ວມກອງປະຊຸມ ໄດ້ຍົກສູງຄວາມຮັບຜິດຊອບ ແລະ ສຸມສະຕິປັນຍາຂອງຕົນ ເຂົ້າໃນການຄົ້ນຄ້ວາ ປະກອບຄໍາຄິດ ຄຳເຫັນ ຕໍ່ກອງປະຊຸມ ຢ່າງກົງໄປກົງມາ ເຮັດໃຫ້ກອງປະຊຸມດຳເນີນໄປດ້ວຍບັນຍາກາດ ຟົດຟື້ນ ແລະ ເປັນເອກະສັນກັນ ຮັບຮອງເອົາ ບົດລາຍງານການເມືອງ ແລະ ທິດທາງຄາດໝາຍສູ້ຊົນ ແຕ່ປີ 2021-2025, ບົດສໍາຫຼວດ ການນໍາພາລວມຂອງຄະນະພັກຊຸດເກົ່າ; ໃນນັ້ນ ໄດ້ຕີລາຄາ ດ້ານດີ ດ້ານອ່ອນ ຂໍ້ຄົງຄ້າງ ສາເຫດ ບົດຮຽນການຊີ້ນຳ ນຳພາ ແລະ ການຈັດຕັ້ງປະຕິບັດມະຕິກອງປະຊຸມ ໃຫຍ່ໃນ 5 ປີຜ່ານມາ, ພ້ອມນີ້ ກອງປະຊຸມຍັງໄດ້ເປັນເອກະສັນຮັບຮອງເອົາ ທິດທາງແຜນການ 5 ປີ ຕໍ່ໜ້າ ນັບແຕ່ປີ 2021-2025.
ກອງປະຊຸມໃຫຍ່ໄດ້ພ້ອມກັນໃຊ້ສິດ ປະຊາທິປະໄຕຂອງຕົນ ປ່ອນບັດຄັດເລືອກເອົາຄະນະພັກຮາກຖານ ຊຸດໃໝ່ ບົນພື້ນຖານ ລວມສູນປະຊາທິປະໄຕ ທັງຖືກຕ້ອງສອດຄ່ອງ ກັບມາດຖານເງື່ອນໄຂທີ່ກຳນົດໄວ້.
ເຊິ່ງມີຜູ້ສະໝັກເລືອກຕັ້ງ ຈໍານວນ 8 ສະຫາຍ, ຍິງ1 ສະຫາຍ, ໃນນີ້ຄັດເລືອກໄດ້ຄະນະພັກຮາກຖານພະແນກຊັບພະຍາກອນທຳມະຊາດແລະ ສິ່ງແວດລ້ອມຊຸດໃໝ່ ມີຈຳນວນ 5 ສະຫາຍ, ຍິງ 1 ສະຫາຍ; ຄື:
- ສະຫາຍ ສົມຫວັງ ນາບຸນແພງ ເປັນເລາຂາ ຄະນະພັກຮາກຖານ
- ສະຫາຍ ອັອດ ສິງສະຫວັດ ເປັນຮອງເລຂາຄະນະພັກຮາກຖານ, ເປັນປະທານກວດກາຄະນະພັກຮາກຖານ.
- ສະຫາຍ ສຸກສັນ ພົນປະດິດ ເປັນກຳມະການ ຄະນະພັກຮາກຖານ
- ສະຫາຍ ຄຳມີ ທຳມະວົງ ເປັນກຳມະການ ຄະນະພັກຮາກຖານ
- ສະຫາຍ ນາງ ອາລຸນນີ ຫຼ້າສຸກັນ ເປັນກຳມະການ ຄະນະພັກຮາກຖານ
ພ້ອມນີ້ກອງປະຊຸມໃຫຍ່ໄດ້ພ້ອມກັນໃຊ້ສິດ ປະຊາທິປະໄຕຂອງຕົນ ປ່ອນບັດຄັດເລືອກເອົາ ຜູ້ແທນສົມບຸນ ແລະ ສຳຮອງ ເຂົ້າຮ່ວມກອງປະຊຸມໃຫຍ່ ຂອງອົງຄະນະພັກແຂວງ ຫຼວງນໍ້າທາ ຄັ້ງທີ VIII
ພາຍຫຼັງສຳເລັດການປ່ອນບັດຄັດເລືອກແລ້ວກອງປະຊຸມໃຫຍ່ ໄດ້ຮັບຟັງຄຳເຫັນໂອ້ລົມຈາກ ສະຫາຍ ຄຳໄຫຼ ສີປະເສີດ ກໍາມະການປະຈຳພັກແຂວງ, ຮອງເຈົ້າແຂວງ ເຊິ່ງສະຫາຍໄດ້ ສະແດງຄວາມຍ້ອງຍໍຊົມເຊີຍ ຕໍ່ການຊີ້ນຳ-ນຳພາຂອງ ຄະນະພັກຊຸດເກົ່າທີ່ໄດ້ ເອົາໃຈໃສ່ຊີ້ນຳ-ນຳພາ ສະມາຊິກພັກ-ພະນັກງານ ປະຕິບັດ ໜ້າທີ່ການເມືອງຂອງຕົນ ຍາດໄດ້ຜົນສຳເລັດຫຼາຍດ້ານພ້ອມກັນນັ້ນ ສະຫາຍຍັງໄດ້ສະແດງ ຄວາມເປັນຫ່ວງເປັນໄຍ ຕໍ່ດ້ານອ່ອນຂໍ້ຄົງຄ້າງ ເຊີ່ງໄດ້ຮຽກຮ້ອງໃຫ້ ຄະນະພັກຊຸດໃໝ່ຈະຕ້ອງໄດ້ສືບຕໍ່ປັບປຸງແກ້ໄຂ, ສະຫາຍໄດ້ໃຫ້ທິດຊີ້ນຳ ວຽກງານໃນແຕ່ລະດ້ານຢ່າງສ້າງສັນ, ສະຫາຍມີຄວາມເຊື່ອໝັ້ນຕໍ່ຄະນະພັກຊຸດໃໝ່ ທີ່ຈະສືບຕໍ່ຊີ້ນຳ-ນຳພາ ຈັດຕັ້ງປະຕິບັດ ມະຕິກອງປະຊຸມໃຫຍ່ຄັ້ງນີ້ ໃຫ້ຍາດໄດ້ຜົນງານ ແລະ ມີຜົນສຳເລັດອັນໃໝ່ ຍິ່ງໃຫຍ່ກ່ວາເກົ່າ.