ໃນຕອນເຊົ້າ ຂອງວັນທີ 29 ກັນຍາ 2021 ຢູ່ທີ່ ຫ້ອງການຊັບພະຍາກອນທໍາມະຊາດ ແລະ ສິ່ງແວດລ້ອມ ເມືອງສິງ ໄດ້ເປີດກອງປະຊຸມ ປະກາດການຈັດຕັ້ງຂອງຫ້ອງການ, ໃຫ້ກຽດເຂົ້າຮ່ວມເປັນປະທານໂດຍ ທ່ານ ສົມລິດ ພອນປະເສີດ, ກໍາມະການປະຈໍາພັກເມືອງ, ຮອງເຈົ້າເມືອງໆສິງ ຜູ້ຊີ້ນໍາຂົງເຂດເສດຖະກິດ, ມີຫົວໜ້າຫ້ອງການ-ຮ້ອງຫົວໜ້າຫ້ອງການ, ຫົວໜ້າໜ່ວຍງານ-ຮອງຫົວໜ້າໜ່ວຍງານ ແລະ ຕະຫຼອດຮອດ ພະນັກງານ-ລັດຖະກອນພາຍໃນຫ້ອງການຊັບພະຍາກອນທໍາມະຊາດ ແລະ ສິ່ງແວດລ້ອມເມືອງສິງ ເຂົ້າຮ່ວມທັງໝົດ 18 ທ່ານ, ຍິງ 5 ທ່ານ.

ໂດຍອີງຕາມຂໍ້ຕົກລົງຂອງລັດຖະມົນຕີກະຊວງຊັບພະຍາກອນທໍາມະຊາດ ແລະ ສິ່ງແວດລ້ອມ ສະບັບເລກທີ 4894/ກຊສ, ລົງວັນທີ 3 ພະຈິກ 2020 ວ່າດ້ວຍ ການຈັດຕັ້ງ ແລະ ການເຄື່ອນໄຫວ ຂອງ ຫ້ອງການ ຊັບພະຍາກອນທຳມະຊາດ ແລະ ສິ່ງແວດລ້ອມ ເມືອງ ເຊິ່ງມີພາລະບົດບາດດັ່ງນີ້:

ຫ້ອງການຊັບພະຍາກອນທໍາມະຊາດ ແລະ ສິ່ງແວດລ້ອມ ເມືອງ, ນະຄອນ ຂຽນເປັນຕົວອັກສອນຫຍໍ້ວ່າ "ຫຊສ" ສັງກັດໃນໂຄງປະກອບກົງຈັກການຈັດຕັ້ງຂັ້ນເມືອງ, ນະຄອນ ມີຖານະເປັນຫ້ອງການຫນຶ່ງຂອງເມືອງ, ນະຄອນ ພາຍໃຕ້ ການຊີ້ນໍາ-ນໍາພາ ແລະ ການຄຸ້ມຄອງທາງດ້ານຊີວິດການເມືອງ ຂອງອົງການປົກຄອງເມືອງ, ນະຄອນ ແລະ ການຊີ້ນໍາ-ນໍາພາ ທາງດ້ານວິຊາການ ຂອງພະແນກຊັບພະຍາກອນທໍາມະຊາດ ແລະ ສິ່ງແວດລ້ອມ ແຂວງ, ນະຄອນຫຼວງວຽງຈັນ, ມີພາລະ ບົດບາດເປັນເສນາທິການໃຫ້ແກ່ອົງການປົກຄອງເມືອງ, ພະແນກຊັບພະຍາກອນທໍາມະຊາດ ແລະ ສິ່ງແວດລ້ອມ ແຂວງ, ນະຄອນຫຼວງວຽງຈັນ ໃນການປົກປັກຮັກສາ ແລະ ນໍາໃຊ້ຊັບພະຍາກອນທໍາມະຊາດ ໃຫ້ມີຄວາມຍືນຍົງ, ປົກປັກສາ ສິ່ງແວດລ້ອມ ບໍ່ໃຫ້ມີມົນລະພິດ ຮັບປະກັນການຈັດຕັ້ງປະຕິບັດການປ້ອງກັນ ແລະ ການຮັບມືຄວາມສ່ຽງຈາກການ ປ່ຽນແປງດິນຟ້າອາກາດ ແລະ ໄພພິບັດທາງທໍາມະຊາດ ແລະ ສະຫນອງຂໍ້ມູນອຸຕຸນິຍົມ ແລະ ອຸທົກກະສາດ ຢ່າງເປັນປົກກະຕິ ແລະ ທັນການ. ຫ້ອງການຊັບພະຍາກອນທໍາມະຊາດ ແລະ ສິ່ງແວດລ້ອມເມືອງ ປະກອບມີ 17 ໜ້າທີ ແລະ ມີ 9 ຂອບເຂດສິດ, ພ້ອມທັງໄດ້ປັບປຸງໂຄງປະກອບການຈັດຕັ້ງ ເຊິ່ງໄດ້ໂຮມໜ່ວຍງານຈາກ 3 ໜ່ວຍງານ ມາເຂົ້າເປັນ 2 ໜ່ວຍງານຄື: ໜ່ວຍງານບໍລິຫານ ແລະ ໜ່ວຍງານວິຊາການ

ໃນວາລະກອງປະຊຸມດັ່ງກ່າວ ທ່ານ ອາລຸນກອນ ທອງປະດິດ ຮອງຫົວໜ້າຫ້ອງການຊັບພະຍາກອນທໍາມະຊາດ ແລະ ສິ່ງແວດລ້ອມ ເມືອງສິງ ໄດ້ຜ່ານຂໍ້ຕົກລົງຂອງ ທ່ານເຈົ້າເມືອງ ວ່າດ້ວຍການແຕ່ງຕັ້້ງ ຫົວໜ້າໜ່ວຍງານວິຊາການ ຂອງຫ້ອງການຊັບພະຍາກອນທໍາມະຊາດ ແລະ ສິ່ງແວດລ້ອມເມືອງສິງ, ເຊິ່ງໄດ້ແຕ່ງຕັ້ງ ທ່ານ ໂກ້ ບົວລະພັນ ອາດິດຫົວໜ້າໜ່ວຍງານທີ່ດິນ ມາເປັນຫົວໜ້າໜ່ວຍງານວິຊາການ ຂອງຫ້ອງການຊັບພະຍາກອນທໍາມະຊາດ ແລະ ສິ່ງແວດລ້ອມລ້ອມເມືອງສິງ.

ໃນໂອກາດດຽວກັນນັ້ນ ທ່ານ ຄໍາແສງ ແດງທາສີງ ກໍາມະການພັກເມືອງ, ຫົວໜ້າຫ້ອງການຊັບພະຍາກອນທໍາມະຊາດ ແລະ ສິ່ງແວດລ້ອມເມືອງສິງ ກໍໄດ້ມີຄໍາເຫັນໂອ້ລົມຕໍ່ກອງປະຊຸມ, ເຊິ່ງທ່ານໄດ້ເໜັ້ນໜັກຫຼາຍບັນຫາ ຕໍ່ກັບພະນັກງານ ໃຫ້ມີແນວຄິດການເມືອງໜັກແໜ້ນ, ຮັກສາໄດ້ຄວາມສາມັກຄີເປັນປຶກແຜ່ນ, ສືບຕໍ່ຕັ້ງໜ້າປະຕິບັດວຽກງານໃຫ້ມີຜົນສໍາເລັດຕາມພາລະບົດບາດ ສິດ ແລະ ໜ້າທີ່ຄວາມຮັບຜິດຊອບ ເພື່ອສູ້ຊົນໃຫ້ບັນລຸເປົ້າໝາຍຕາມແຜນການທີ່ວາງໄວ້.

ໃນຕອນທ້າຍກອງປະຊຸມ ຍັງໄດ້ຮັບຟັງການໂອ້ລົມຂອງ ທ່ານ ສົມລິດ ພອນປະເສີດ, ກໍາມະການປະຈໍາພັກເມືອງ, ຮອງເຈົ້າເມືອງໆສິງ, ກ່ອນອື່ນທ່ານຍັງໄດ້ຍ້ອງຍໍຊົມເຊີຍຕໍ່ການຊີ້ນໍາ-ນໍາພາຂອງຄະນະນໍາຫ້ອງການ ແລະ ການເອົາໃຈໃສ່ຈັດຕັ້ງປະຕິບັດວຽກງານຂອງພະນັກງານວິຊາການພາຍໃນຫ້ອງການ ທີ່ໄດ້ມີຜົນງານພົ້ນເດັ່ນຫຼາຍດ້ານ ແລະ ທ່ານຍັງໄດ້ຮຽກຮ້ອງໃຫ້ພະນັກງານພາຍໃນຫ້ອງການ ສືບຕໍ່ເອົາໃຈໃສ່ ຈັດຕັ້ງປະຕິບັດວຽກງານໃຫ້ມີຜົນສໍາເລັດຕາມລະດັບຄາດໝາຍ, ໂດຍສະເພາະການປົກປັກຮັກສາສິ່ງ ແລະ ຄຸ້ມຄອງສິ່ງແວດລ້ອມ ແລະ ການຂຶ້ນທະບຽນອອກໃບຕາດິນ ໃຫ້ໄດ້ຕາມແຜນການທີ່ວາງໄວ້.